"Tislit d immas" Tamdyazt

A tislit, ḥḍu g imi “nɛam!”, “xyar!” // Ad ur yawy ka g imi nnm afrruɣ. (Izli)
…

- Tnna tslit ass lli g tettifiḍ:

Azul fllawn, a ku yan d iṛaḥn (i),
Rnuyat g iḍaṛn, ad tiẓiṛm abuqs (i);
Tiḥli n muzun, gan i d amm tafukt (i),
Lsiɣ aɛban iḥla; d taẓult i walln (i).
Illa uḥidus, da t ittaɣ baba inw (i);
Waxxa iwssir, ggullan i sburuzn i.
ɣran i ikabaṛn, ad d aggin taxamt (i);
Wanna iran amdaz iẓiln, iṛaḥ d (i),
Ig aɣ bdd akk° ad di taɣ tafukt (i)
Ku yan digun yumu, yasy urawn (i)
Ad as di nas d idukan g iḍaṛn (i)
Ur i isikkin dinna g i smrratn (i)
Hat ur t tcin waxxa issn srutn (i)
Dinna s ndda nmun as i twuri nns (i).

- Trar as d immas:

Tnna as tmɣart i yillis yafuḍn (i):
Addu d! Mani km? Ad ur i tzrrimt (i)!
Addu d! Mani km? Ad aɣ iffɣ umarg (i)!
Ha kmin tddid s amazir yaggugn (i),
Wa amẓ awal s ittimim waḍu nnm (i)!
Ka n ismigiln ad igan tarragt (i).
Tettawid s axam; tiguta ur ibbiyn (i).
Nniɣ am: xir am! Hat ur riɣ tawant (i),
Ad ur tmyard, a ta, ɣur baba nnm (i).

Ad ur tggand ad di taɣ tafukt (i)!
Tifawt, ifassn ad ilin d uɣujjr (i).
Tanna ihrran tawuri tɣiy asn (i),
Imi mk ṛwan walu ma km ittaɣn (i),
Tirid kigan wa yuwi km ira km (i);
Babam d immam widda ɣur tllamt (i)
Wa g amm tamamt, alili ur am iḥli!
Wanna iran afra yawi tn, afin t (i),
Isikk d imi nns awal iṛwan, inm (i).”

- Trar as d tslit:

A mma inw, usiɣ agg°a i twada inw (i),
Ad ur tiɣild is ur asn lmidɣ (i),
Ddiɣ ard inin: “Ta d illi ur uriwɣ (i),
A tislit inw, a lalla n memmi inw (i);
Aɛri nns ilan taduli tɣuda asn (i)!
Tgid ikḍif irɣan, a ta, dlan issm (i)
Tgid aɣbalu; ur aɣ iqqur wanu nnɣ (i)
Sswiɣ issm amud; tayafut nusi km (i)
Nga awd imassn iẓiln i tg°rsa nnm (i)
Nsakka km inn iwr inn as i tṛuẓi nnm (i)!”

...
Ḥamid Ṭalibi

---------
Amawal:
+ ismigiln: conseils.
+ tarragt: cadeau.
+ tayafut: récolte.
+ tamamt: miel.
+ alili: laurier rose.
+ afra: sérenité,paix

+ aɣujjr: petit déjeuner.