Tabrat n tayri..

Ar d kttigh ussan nnegh imzwura nekk d kem, zrin gan zund tawargit ...Seg tillas n umzruy ..tayrinu akm id asigh..
Ur nnigh ad ttugh ,urrigh ad tettut amarg n gratengh d ilulan ammas n tfsut*, i3lula ammas n igran ger ma igan ajddig d tizgzut n talldrar*..Amarg n gratengh igan tayri irghan zund ussan n unbdu*..tga wam tghbalut izddigen g nssa aman iqrfen, g tssat aman izddigen s tfassin nnem ighman lhnna ..
Tighufiwin g tgrsin, awal nnem tsllaghas g awal n tmqqa n unzar, d asidd n tachmaât as am n ttaragh ar am n traragh i tbrat nnem tamzwarut ula tiyyad...
Mqqar agh ibdva uâraq, ighuliden ula illn* hat ur nnigh ad ttugh tiwalnin nnem ighman d asksu nnem ihnunan i ttadjan akem irigh s tasanu yaghen .. tiyyat n ulinu tzayadent ig sllagh i wawal nnem asdidan igan akw tayri d tasa..
Ur sar ttugh idv lligh g n mnagar g tmghra n id khalim , nudja ait uhydus , nffegh, nkchem s urti , nqqim ddaw ddilit.. d wayyur issuddan.. advu n wujjan d za3fran..iga iqimi zund win nekk d yat tanirt*..
Asudem i tanchuchin nnem irghan itrgigin s tawda, aslaf i tfkka* nnem ilggwaghen zund lahrir.. Agud izri zik tzayd tghufi i tayyad..
Araghamenn akw ayad a kem id sktigh, tisint is kem ur ttugh, akhmmem nnem digi, mqqar zrin iyirn d isggwasen..
Tssusmi kigan tmnat lligh tgit g tigra n tbrat nnem :
"A tabrat i mer gigh wam kmmin
A d iligh g jjwa ad izvirgh asmuninu.."
Ar da n tmyizvir g ussan n tummert d lhna...ar timlilit*..

AMAWAL :

Tafsut : printemps

Talldrar: printemps aussi

Anbdu : ètè

Illen : les mers

Tanirt : ange

Tafkka: corp

Ar timlilit: au revoir